Kryeministri në detyrë i Malit të Zi, Dritan Abazoviq, ka reaguar pas sulmeve në veri të Kosovës, ku rreshteri policor Afrim Bunjaku mbeti i vrarë nga terroristët serbë. Ai ka thënë se kjo ishte një tragjedi, derisa ka apeluar Kosovën dhe Serbinë që të provojnë pajtimin.
Në një paraqitje për media, Abazoviq ka thënë situata të dielën lehtë mund të kalonte në konflikt më të madh, e i cili do të kishte pasoja të mëdha.
Abazoviq: Tragjedi dhe vazhdimësi e një politike të keqe ballkanike
“Tragjedi dhe vazhdimi i një politike katastrofike ballkanike nga e cila, për fat të keq, ne si rajon nuk mund të dalim. Personalisht, ashpër dënoj dhunën, vrasjet, çfarë të themi tjetër, me vërtet të gjithë ishim të tronditur, kjo situatë mund të kalojë lehtësisht në një konflikt, një më të madh, që do të ketë pasoja katastrofike për të gjithë, dhe kështu është fatkeqësinë e kemi dhe ajo që nuk donim të kishim është gjaku në rrugë”, ka thënë ai.
Përkundër faktit se terroristët vranë rreshterin policor Afrim Bunjaku dhe sulmuan Policinë e Kosovës, Abazoviq mendon se pajtimi është zgjidhja.
Abazoviq: Kosova dhe Serbia të provojnë pajtimin
“Mali i Zi i qëndron pranë asaj që ka përfaqësuar edhe deri tani, ne mendojmë se politika e viteve 1990 duhet të marrë fund. Pra, popujt në këto treva kanë provuar gjithçka përveç pajtimit, prandaj apeli im është edhe në raport me popullit serb edhe në raport me popullin shqiptar, më në fund provoni një herë pajtimin. Ju keni provuar gjithçka, përpiquni të pajtoheni, besoj se do t'ju pëlqejë të gjithëve, për të gjithë do të jenë mirë, garantoj që kështu do të jetë. Provoni atë që nuk e keni provuar kurrë, përndryshe ne të gjithë do të jemi në një problem të madh, të madh, të madh, nuk kemi oreks, as dëshirë dhe nuk na takon në asnjë mënyrë të marrim pjesë të mësojmë dikë se çfarë të bëjë siç duhet të sillet. Dhuna nuk është zgjidhje, sidomos dhuna që përfundon me konfrontime të përgjakshme, nuk është zgjidhje dhe le të përpiqemi të bëjmë diçka tjetër në të ardhmen për të mirën e të gjithë qytetarëve të rajonit”, ka thënë ai.
