Serbë të shumtë kanë protestuar sot në veri të Mitrovicës për të kundërshtuar rregulloren e Bankës Qendrore të Kosovës (BQK), e cila e përcakton euron si valutë të vetme në vend. Edhe pse protesta ishte paralajmëruar nga shoqata e pensionistëve serbë të Kosovës, ajo ishte organizuar nga subjekti politik “Lista Serbe”, ndërsa në një lokal aty pranë u pa edhe flamuri rus.
Në këtë protestë i pranishëm ishte edhe Zllatan Ellek, i cili pretendoi se vendimi i BQK-së, po e përkeqëson situatën në veri.
Ai shfrytëzoi rastin që para masës të fliste edhe për mbledhjen e Këshillit të Sigurimit, për çka dezinformoi duke thënë se i vetmi që u mbajt përgjegjës për sigurinë në Ballkan ishte kryeministri i Kosovës, Albin Kurti. Derisa nuk hezitoi të thoshte edhe se gjoja serbët po “luftojnë për mbijetesë”.
Ellek: Nuk pajtohemi me vendimet e Kurtit
“Ky është rasti të themi që nuk pajtohemi me vendimet e Albin Kutit, të cilat vendime vetëm sa e përkeqësojnë këtë situatë në veri. Dhe, në takimin e Këshillit të Sigurimit të Kombeve të Bashkuara, është thënë, 13 prej tyre nga 15 (prej shteteve anëtare) janë pajtuar që ai që krijon probleme e që shkakton telashe është Albin Kurti. Ne jemi vëllezër dhe motra, të përcaktuar për paqe, po luftojmë për mbijetesë, duam që fëmijët tanë, si të gjithë fëmijët në botë të mund të shkollohen, të merren me sport, të kemi përmbajtje kulturore dhe jeni dëshmitarë se që 25 vjet, nuk kemi asgjë nga kjo, duhet pavarësisht nga të gjitha të këmbëngulim ashtu si u tha këtu, ne jemi në tokën tonë, asgjë te askujt nuk kemi marrë dhe në të gjitha ato provokime duhet të përgjigjemi siç tha Vladika Teodosije, me qetësi dhe krenari. Kjo është ajo që thonë: erdhi deri te fundi por sinqerisht shpresoj, që ka drejtësi edhe për ne serbët dhe se bashkësia ndërkombëtare duhet të thotë njëherë mjaft shkatërrimit ndaj serbëve që jetojnë ne Kosovë”, pretendoi ai.
Në protestën e sotme, për të cilën burime të KosovaPress-it bënë të ditur serbët që punojnë në institucionet paralele/ilegale janë detyruar të marrin pjesë duke u kërcënuar me largim nga puna, folësit u shprehën kundër ndalimit të dinarit.
Dragana Milenkoviq, profesoreshë e Fakultetit Ekonomik tha se vendimi i BQK-së është diskriminues, derisa pretendoi se i njëjti është i motivuzar politikisht.
Milenkoviq: Vendimi i BQK-së është diskriminues
“Si profesoreshë e Fakultetit Ekonomik, mund t'ju them më drejtpërdrejt se vendimi i Bankës Qendrore të Kosovës është diskriminues, i motivuar politikisht dhe kërcënon drejtpërdrejt mbijetesën e popullit serb në Kosovë. Si prind, me këtë vendim vihet në pyetje ajo se si do të blejnë prindërit ushqim për fëmijët e tyre, si do t'i marrin studentët bursat, si dhe nga çfarë do të paguajnë tarifat e shkollës, si do të paguajnë provimet? Heqja e dinarit, i cili për herë të parë është krijuar në vitin 1214 mu në zonën e Kosovës, më saktë në Novobërdë, do të thotë heqje e jetës për popullin tonë”, tha ajo.
As ajo nuk la pa adresuar kritika për kryeministrin Albin Kurti, ndaj të cilit të shtunën është raportuar se ka pasur kërcënime me atentat. Ajo e akuzoi të parin e ekzekutivit për nacionalizëm ekstrem, ani pse ky i fundit shumë herë i është drejtuar popullit serb në gjuhën serbe.
Milenkoviq: Kurti është mbështetës i nacionalizmit ekstrem
“Albin Kurti e zbatoi futjen e njëanshme të euros nënshkrimin e asnjë marrëveshje monetare me Bashkimin Evropian dhe me Bankën Qendrore Evropiane, ky nuk është një hap përpara drejt paqes dhe stabilizimit për çka po angazhohet Bashkimi Evropian në këto hapësira. Ne e dimë që bëhet fjalë për njeriun i cili është mbështetës i politikës së popullzimit social dhe nacionalizmit ekstrem, nuk ekziston asnjë hap të cilin e ka bërë që serbët gjatë pushtetit të tij të ndihen më mirë”, pretendoi ai.
Edhe drejtoresha e shkollës fillore të Ugljarës, Vesna Martinoviq pretendoi se është e shqetësuar lidhur me atë “se si do t'u sigurojë fëmijëve libra, aksesorë dhe ushqime për shkak të ndalimit të dinarit”. Vendimin e BQK-së, ajo e quajti “çmenduri”.
Martinoviq: Evropa të na dëgjojë
“Ne janë këtu për të kërkuar që dikush në Evropë të na dëgjojë dhe të ndalojë Qeverinë në Prishtinë për të ndikuar në vendimet e saj të çmendura, sepse është thjesht e pabesueshme që ky vendim të mbetet në fuqi”, u shpreh ajo.
Punonjësit e strukturave paralele/ilegale serbe në Kosovë, kanë pranuar mesazhe e njoftime nga udhëheqësit e tyre dhe janë detyruar të marrin pjesë në protestë, edhe përkundër vullnetit të tyre, bëjnë të ditur burime të KosovaPress-it.
I njëjti burim në kushte anonimiteti theksoi se në rajonin e Gjilanit shumë qytetarë serbë, punonjës të strukturave ilegale, kanë hezituar për të marrë pjesë, por të njëjtit janë kërcënuar me vende të punës.
Burimi tha se detyrimet për të marrë pjesë janë të qëllimshme, pasi që sipas të njëjtit, për “Listën Serbe” është i rëndësishëm viktimizimi para faktorit ndërkombëtar dhe kjo të duket që protesta ka mbështetje të madhe nga qytetarët serbë të Kosovës.
Transporti është organizuar nga të gjitha komunat me shumicë serbe, ndërsa ata që kanë përdorur vetura private, janë kompensuar për derivate.
