Ish-ministri i Pushtetit Lokal, Sadri Ferati, ka folur rreth thirrjes së Listës Serbe të cilët kanë kërkuar që të bojkotohet procesi i referendumit të 21 prillit për shkarkimin ose jo të katër kryetarëve në veri.
Sipas Feratit, një nga faktorët e thirrjes së këtij bojkoti, mund të jetë se Lista Serbe tani e ka frikën që nuk e kanë mundësinë e mëhershme për t’i frikësuar qytetarët në atë pjesë të vendit.
Megjithatë, ish-ministri vlerësoi se një veprim i tillë nga Lista Serbe ka ndodhur edhe në të kaluarën.
“Nuk na ka befasuar Lista Serbe pasi edhe në të kaluarën roli i tyre ka qenë shumë destruktiv. Sado që pas dorëzimit të peticionit të pjesëmarrjes së tyre, pra të Listës Serbe dhe komunitetit serb në atë pjesë, është për tu diskutuar pse po ndodhë një gjë e tillë. Është një numër i madh i qytetarëve të komunitetit serb që figurojnë në listat e votimit, e nuk banojnë në Mitrovicë. Faktori tjetër është se një frikë është që Lista Serbe më nuk e ka mundësinë e frikësimit të qytetarëve, ashtu siç e kanë pasur më herët, ngase pas Banjskës është një numër i madh i madh i personave që i kanë frikësuar qytetarët atje. Kjo frika e ndikimit të Listës Serbe dhe frika se një numër i qytetarëve s’do të marrë pjesë në votim, do të jetë shumë e vështirë të sigurohet 50 përqindëshi, që si duket i ka bërë ata që të bëjnë thirrje për bojkot”, deklaroi Ferati në emisionin “InfoNata”.
Po ashtu, Ferati tha që Kosova duhet të ketë bashkëpunim me bashkësinë ndërkombëtare, në mënyrë që të rritet presioni për të mos i pranuar argumentet e Listës Serbe dhe presidentit serb, Aleksandar Vuçiq, që t’i përjashtojnë një pjese të qytetarëve nga institucionet në veri.
Ndërkaq, i pyetur se a duhet të konsiderohet që ky proces po shkon drejt dështimit, Ferati potencoi se sipas të gjitha gjasave, katër kryetarët do ta vazhdojnë mandatin deri në fund.
