Në pamje të parë duket krejtësisht normale.
Por në veturën e një qytetari serb në Leposaviq u gjend një mjet eksploziv.
Rasti ka ndodhur brenda fshatit Tvergjan të komunës së Leposaviqit të martën.
Pronari i veturës sipas Policisë së Kosovës është punonjësit në njërin nga institucionet e Kosovës.
Madje, ai ka treguar në polici që dyshon se pikërisht puna e tij në institucione mund të jetë arsye që i është vendosur ky mjet, pasi thotë që nuk ka problem me askënd.
Ai kishte njoftuar organet e rendit posa kishte vërejtur diçka të dyshimtë nën veturën e tij.
Policia e Kosovës ka arritur në vendin e ngjarjes bashkë me njësitin K9 dhe atyre për deminim të mjeteve eksplozive.
Zëvendësdrejtori i policisë për rajonin e veriut, Veton Elshani ka thënë se rastin për ta hetuar e kanë marrë departamenti për krime të rënda.
“ Rreth orës 11:00 është e vërtetë se kemi pranuar një informacion për një mjet të dyshuar e cila ishte nën një veturë të një personi shtetas kosovarë, i përkatësisë serbe, policia ka shkuar aty bashkë me njësitet të specializuara adekuate, edhe me njësitë policore me qenë, edhe njësitet e KFOR-it për dominim kanë qenë aty dhe është larguar ajo sasi e cila besohet se është eksploziv” , ka thënë Elshani.
Reagim ka pasur edhe nga ministri i Brendshëm, Xhelal Sveçla.
“Kur Serbia humbet betejat politike, në mungesë argumentesh kthehet te retorika luftnxitëse dhe aktet e dhunës deri në terrorizëm. Tendenca për kontrollin e pjesëtarëve të komunitetit serb në Kosovë vazhdon, por çdo ditë me më pak sukses. Zërat kundërshtarë në radhët e komunitetit po shtohen çdo ditë, për të çliruar qytetarët nga gangsterët dhe kuazi politikanët pro Serbi. Kërcënimeve, djegies së pronave, vendosjes së eksplozivit dhe rrezikimit të jetës por dhe shtypjes së atyre që mendojnë drejtë e ndryshe, i ka kaluar koha”, ka shkruar ai.
Në vendin e ngjarjes, u konfiskuan, një paketim eksploziv plastik (prodhim serb), një detonator elektrik, një bateri 9 volt, 6 magnete dhe një tel përcues.
Në lidhje me këtë rast ka reaguar edhe Misioni i KFOR-it.
Në reagimin e tyre, thuhet se Policia në koordinim me një ekip të KFOR-it të ShBA-së për EOD, e kanë larguar në mënyrë të sigurt mjetin e pashpërthyer nga vendi.
Para pak javësh, një hetuesit policor serb në Mitrovicë të veriut, iu është djegur vetura, tashmë hetimet për këtë rast janë duke vazhduar.
