Një tërmet me fuqi 6.4 goditi Assam këtë mëngjes, tha Qendra Kombëtare e Sizmologjisë së Indisë.
Sipas mediave të huaja, dridhje të forta janë ndjerë në pjesë të verilindjes, si dhe në veri të Bengalit.
Ndërsa nuk ka raportime për ndonjë të lënduar, janë shfaqur fotografi të mureve dhe dritareve të thyera.
Lëkundje të forta u ndien në mënyrë të përsëritur në disa pjesë të verilindjes dhe Butanit fqinj, duke i detyruar njerëzit të dilnin nga shtëpitë e tyre, sipas një dëshmitari të Reuters.
Siç bëhet e ditur, epiqendra e tërmetit ishte afër qytetit Dhekiajuli, 140 km (86 milje) në veri të Guwahati.
Tërmeti goditi në 7:51 të mëngjesit në një thellësi prej 17 km nga sipërfaqja.
Kryeministri Narendra Modi tha se ka folur me kryeministrin e Assam, Sarbananda Sonowal dhe premtoi ndihmë nga pushteti qendror.
Ndërkohë ministri i Shëndetësisë Himanta Biswa Sarma, i cili shkroi në Twitter disa minuta pas tërmetit, ndau gjithashtu foto të mureve të dëmtuar brenda një ndërtese dhe të një muri kufiri, duke treguar ndikimin e tërmetit.
Ndryshe, India po përballet edhe me një gjendje të rëndë sa i përket rasteve dhe vdekjeve nga COVID-19.
Numri i të vdekurve në Indi nga coronavirusi është rreth 200.000, ndërsa forcat e saj të armatosura kanë premtuar ndihmë urgjente mjekësore për të ndihmuar në luftën kundër rritjes marramendëse të infeksioneve.
