Vaksina e Moderna-s është aprovuar nga qeveria amerikane, duke i hapur asaj rrugën për lëshimin e miliona dozave në vend.
Sipas BBC, autorizimi nga Administrata e Ushqimit dhe e Barnave (FDA) vjen një javë pas miratimit të vaksinës Pfizer-BioNTech që tani ka filluar me shpërndarjen.
SHBA-ja ka porositur 200 milionë doza të vaksinës Moderna, derisa gjashtë milionë mund të shpërndahen që tani.
Vendi është njëherësh zona më e goditur në botë nga pandemia, për nga numri i rasteve dhe viktimave.
Numri i përgjithshëm i të prekurve nga coronavirusi në SHBA vlerësohet të jetë rritur në 17.5 milionë, derisa numri i vdekjeve është mbi 313 mijë.
Komisioneri i FDA-s, Stephen Hahn tha se miratimi emergjent i vaksinës shënoi një “hap tjetër thelbësor në luftën kundër kësaj pandemie globale”.
Rregullatori shëndetësor e konfirmoi gjatë kësaj jave që vaksina e Moderna-s është e sigurt dhe 94 për qind efektive.
