Organizata Botërore e Shëndetësisë u shpreh se të gjitha vaksinat e aprovuara deri më tani janë efektive ndaj të gjithë varianteve të virusit COVID-19, teksa bëri thirrje qe njerëzit te evitojnë fluturimet ndërkombëtare.
Organizata Botërore e Shëndetësisë u shpreh se të gjitha vaksinat e aprovuara deri më tani janë efektive ndaj të gjithë varianteve të virusit COVID-19. Hans Kluge, drejtori i OBSH-së për Evropën u shpreh se edhe pse situata në Evropë është drejt përmirësimit, fluturimet ndërkombëtare duhet të evitohen, raporton euronews.al.
“Mund të themi me siguri se të gjitha vaksinat e aprovuara mbrojnë ndaj të gjitha varianteve të Covid-19, por sërish mënyra më e mirë për të kufizuar përhapjen e një vale tjetër është rritja e ritmit të vaksinimit dhe respektimi i rregullave, si mbajtja e distancës dhe higjiena personale”, tha Hans Kluge, drejtor i OBSH-së për Evropën.
Sipas OBSH-së, shqetësues mbetet fakti që varianti indian i virusit tashmë është identifikuar në mbi 50 shtete në mbarë globin. Sipas të dhënave nga OBSH, në rajonin e Azisë qendrore, numri i rasteve të reja të infektimeve është ulur me 60% në muajin e fundit, nga 1.7 milionë raste në mesin e muajit prill, në 685 mijë të regjistruar javën që shkoi.
