Dy ditë pasi një seri tërmetesh goditën Turqinë jugore, përpjekjet e ndihmës nuk kanë arritur ende në disa zona të vendit. Provinca e Hatay, e cila është shtëpia e rreth 500,000 refugjatëve sirianë, është goditur veçanërisht rëndë, me ekipet e shpëtimit të mbingarkuar nga niveli i shkatërrimit. Ndihma është vonuar për shkak të dëmeve të konsiderueshme që tërmeti ka shkaktuar në rrugë dhe në aeroportin civil pranë kryeqytetit të provincës, Antakia, përcjell Bota sot.
Al Jazeera foli me dy gra refugjate siriane, të cilat jetojnë në qytetin Reyhanli në provincën Hatay, pranë kufirit me Sirinë. Të dy ishin të ve në luftën në Siri dhe kishin ikur përtej kufirit shtatë vjet më parë, në kërkim të sigurisë për fëmijët e tyre.
Rrëfimi i Um Hadi, nënë e katër fëmijëve
Kur ra tërmeti i parë, ne ishim duke vizituar Um Khalid. Ndjemë se do të na gëlltiste shtëpia, e ndjemë se do të vdisnim. Na iku rryma, por ne arritëm të iknim jashtë.
Të qara, vajtime, frikë, të ftohtë dhe shi! Ishte më keq se bombardimet në Siri, më keq se avionët luftarakë. Kur avionët po vijnë për të bombarduar, i dëgjon, e di se po vijnë, mund të fshihesh. Me tërmetin nuk e dini se kur do të godasë.
Ne dolëm dhe qëndruam nën një pemë në të ftohtë, ndërsa toka vazhdonte të dridhej. Ishim duke ngrirë kështu që ndezëm një zjarr të vogël për t'u ngrohur. Nuk kishim ku të shkonim dhe kishim shumë frikë të ktheheshim brenda shtëpive tona, të cilat ishin ende në këmbë, por të dëmtuara nga tërmeti.
Kemi kaluar dy netë të tilla tashmë, ulur në karrige jashtë, në të ftohtë, pa gjumë asnjë minutë. Ne jemi sërish refugjatë të pastrehë.
Sot komuna ka vendosur disa çadra që njerëzit t'i përdorin si strehë, por nuk na ka ardhur asnjë ndihmë, askush nuk ka ardhur të na ndihmojë.
Furrat e bukës nuk funksionojnë. Edhe nëse doni të blini bukë, nuk mund të gjeni. Shkova nëpër të gjithë qytetin duke kërkuar të blija ushqim për fëmijët tanë dhe nuk gjeta asgjë përveç biskotave dhe samunit [një lloj simite], dhe ato ishin gjithashtu të shtrenjta.
Çmimet e gjithçkaje janë rritur dy deri në tre herë. Bleva një qiri për të pasur pak dritë natën; tani është 15 lira [0,80 dollarë], dikur ka qenë katër [0,20 dollarë].
Ende nuk ka energji elektrike, nuk ka ujë të rrjedhshëm, nuk ka gaz, nuk ka karburant. Spitalet janë të gjithë të dëmtuar. Nga tërmeti ka pasur edhe persona të vrarë. Dëgjuam se minarja e një xhamie ra mbi një makinë ku ishte fshehur një familje dhe i vrau. Ka edhe viktima të tjera, por jo aq sa Antakia. Aty ka shumë të vdekur, shumica sirianë.
