Koalicioni i vendeve të G7 zbuloi të mërkurën një kornizë afatgjatë të sigurisë për Ukrainën, duke thënë se do të kërkojë të zbatojë një agjendë reformash për të ndihmuar në sigurimin e Kievit me “qeverisjen e mirë të nevojshme për të përparuar drejt aspiratave të tij euro-atlantike”.
“Ne e konsiderojmë pushtimin e paligjshëm dhe të paprovokuar të Ukrainës nga Rusia si një kërcënim për paqen dhe sigurinë ndërkombëtare, një shkelje flagrante të së drejtës ndërkombëtare, duke përfshirë Kartën e OKB-së, dhe të papajtueshme me interesat tona të sigurisë”, ka thënë G7 në një deklaratë të përbashkët mbështetjeje.
“Ne do të qëndrojmë me Ukrainën ndërsa ajo mbrohet nga agresioni rus, për aq kohë sa të duhet”.
Duke përshkruar mënyrën se si G7 do të mbështesë Ukrainën në një afat të gjatë, deklarata e përbashkët thotë se vendet do të sigurojnë “një forcë të qëndrueshme të aftë për të mbrojtur Ukrainën tani dhe për të penguar agresionin rus në të ardhmen” duke ofruar pajisje moderne ushtarake në tokë, ajër dhe det, trajnime për forcat ukrainase dhe shkëmbimin e inteligjencës.
G7 tha se do të përpiqet gjithashtu të forcojë stabilitetin ekonomik të Ukrainës, duke përfshirë përpjekjet për rimëkëmbje, “për të krijuar kushte të favorshme për promovimin e prosperitetit ekonomik të Ukrainës”.
Vendet u zotuan të ofrojnë mbështetje teknike dhe financiare për nevojat imediate të Ukrainës si rezultat i pushtimit në shkallë të plotë nga ana e Rusisë.
