Qeveria e Venezuelës ftoi gazetarët të vizitojnë Qendrën e Burgjeve Tocoron në shtetin Aragua të shtunën, disa ditë pasi forcat e sigurisë rimorën kontrollin e një burgu që ka shumë vite nën kontrollin e bandave.
Burgu Tocoron, një nga më të mëdhenjtë në vend, kishte qenë më parë nën kontrollin e drejtpërdrejtë të të burgosurve, shumë prej tyre anëtarë të bandës së fuqishme kriminale transnacionale “Tren de Aragua”, (Treni i Aragua), i quajtur sipas shtetit në të cilin, Tocoron ndodhet.
Të mërkurën, forcat e sigurisë venezueliane, përfshirë ushtrinë dhe gardën kombëtare, kryen një operacion special me më shumë se 11 mijë personel për të rimarrë kontrollin e territorit të burgut.
Ministri i Brendshëm i Venezuelës, Remigio Ceballos, tha se operacioni ishte “një sukses i plotë”. Gjatë turneut mediatik të shtunën, Ceballos njoftoi se 80 anëtarë të rangut të lartë të bandës Tren de Aragua ishin arrestuar nga forcat e sigurisë pas rimarrjes së burgut.
Ceballos mohoi raportet e mediave se qeveria ka negociuar me krerët e bandave përpara operacionit.
“Ne kemi çmontuar plotësisht grupin drejtues të të ashtuquajturit ‘Tren de Aragua’. Ata janë zhdukur”, tha ai për CNN en Espanol.
Mijëra të burgosur u transferuan në burgje të tjera pas operacionit, sipas Ministrisë së Informacionit të Venezuelës. Megjithatë, të afërmit e të burgosurve i kundërshtojnë këto pretendime, duke thënë se ata nuk kanë folur me të afërmit e tyre që nga mëngjesi i operacionit.
