Ministri i shëndetësisë i Sllovakisë, Marek Krajci njoftoi të enjten se po jepte dorëheqjen për të qetësuar krizën politike rreth akuzave për keqmenaxhim të pandemisë COVID-19.
“Dy parti të vogla të koalicionit kanë vendosur kushte me dorëheqjen time. Unë nuk dua të ndërhyj në punën e qeverisë dhe po jap dorëheqje”, u tha ministri gazetarëve.
Koalicioni qeverisës i qendrës së djathtë me katër parti është nën presion për shkak të keqmenaxhimit të pandemisë pasi shkalla e vdekjes për frymë banori në Sllovaki është e dyta më e larta në botë, pas faqinëve të Çekisë, raporton aljazeera.
Dy parti, SaS dhe Za Ludi, insistojnë në riorganizimin e qeverisë së formuar në muajin mars të 2020, e udhëhequr nga Igor Matoviq, i cili është gjithashtu kreu i partisë OLaNO, pas blerjes së diskutueshme të dy milionë dozave të vaksinës ruse Sputnik V.
Sllovakia, anëtare e Bashkimit Evropian me një popullsi prej 5.4 milionë banorësh, ka nivelin më të lartë të infeksionit në botë, sipas të dhënave zyrtare nga agjencia France Presse.
