Shefi i Agjencisë së Sigurisë Informative të Serbisë (BIA), Aleksandar Vulin dhe ministri i Punëve të Jashtme, Ivica Daçiq po marrin pjesë në konferencën ndërkombëtare të sigurisë në Moskë.
Moska është nikoqire e seancës plenare të Konferencës së 11-të Ndërkombëtare të Sigurisë, ndërsa të pranishmëve iu drejtua Sekretari i Këshillit të Sigurimit të Rusisë, Nikolay Patrushev, i ndjekur nga Presidenti i Republikës Srpska, Milorad Dodik, i ftuar nderi i ngjarjes.
Në seancë përveç tij kanë marrë pjesë edhe Vulin dhe Daçiq, raporton N1.
Milorad Dodik tha se populli serb u bë viktima e parë e hegjemonisë së faktorëve perëndimor dhe NATO-s. “Agresioni i parë i NATO-s u krye kundër Republikës Srpska, pastaj Serbisë, pastaj vendeve të tjera”, kujtoi ai.
Lideri i serbëve të Bosnjës vuri në dukje se sot e gjithë politika ndërkombëtare është në një dinamikë të përshpejtuar, po krijohet një rend multipolar me struktura të reja pushteti.
Në këtë aktivitet në Moskë, përveç Serbisë dhe entitetit të BeH, Republika Srpska, mori pjesë edhe kryetari i Partisë Demokratike të Serbëve të Maqedonisë së Veriut, deputeti Ivan Stoilkoviq.
Pjesëmarrësit e konferencës diskutojnë tema që lidhen me sigurimin e sigurisë kombëtare, rajonale dhe globale.
Ndërsa kanalet ruse Telegram shkruajnë se pas takimit të djeshëm me presidentin e Federatës Ruse Vladimir Putin, Dodik foli sot në seancën plenare të Takimit të 11-të Ndërkombëtar të Përfaqësuesve të Lartë të ngarkuar me çështjet e sigurisë.
