Letonia është detyruar deri më tani të asgjësojë 2.1 milionë doza të vaksinës kundër Covid-19 për shkak të arritjes së datës së skadencës, tha Shërbimi Kombëtar i Shëndetit Letonez (NVD).
Nga viti 2020 deri në dhjetor 2023, Letonia ka marrë 9.4 milionë doza vaksinash.
Ministria e Shëndetësisë raporton se gjatë kësaj periudhe kohore Letonia ka dhuruar 2.5 milionë doza për vendet e treta.
Aktualisht vaksinimi kundër Covid-19 në Letoni bëhet duke përdorur vaksinat Nuvaxovid dhe Comirnaty. Ekzistojnë 750 400 vaksina për Covid-19 në dispozicion për t’u përdorur, pasi skadimi i tyre është në 2024 dhe 2025, siç raportohet nga Qendra për Parandalimin dhe Kontrollin e Sëmundjeve.
Sipas kontratave të nënshkruara ndërmjet Komisionit Evropian dhe prodhuesve të vaksinave, informacioni delikat, përfshirë informacionin financiar si, çmimet konsiderohet konfidencial dhe nuk mund t’u zbulohet vendeve të treta, raporton NVD.
NVD thekson se përfundimi i kontratës ose ndryshimet janë të mundshme nëse të dyja palët bien dakord me të dhe punojnë së bashku për të. Shtetet anëtare të BE-së kanë krijuar një komitet të përbashkët për prokurimin e vaksinave që negocion me prodhuesit e vaksinave në emër të vendeve me qëllim që të sigurojë kushtet më të mira të mundshme për të gjitha vendet.
Marrëveshja e fundit për amendamentet u arrit në maj 2023. Kjo marrëveshje parashikon uljen me 22% të vëllimit të vaksinave që do dërgohen në Letoni.
