Aktori veteran i hollywoodit, Robert De Niro dhe aktori i ri britanik, John Boyega, do të luajnë në filmin e ardhshëm “The Formula”.
Dyshja e kinematografisë i është bashkuar kastës së aktorëve të filmit të ri të Netflixit, regjinë e së cilit do ta bëjë Gerard McMurray.
Filmi e rrëfen historinë e ngasësit të talentuar të garave “Formula 1”, i portretizuar nga Boyega, i cili detyrohet të shndërrohet në shofer të disa kriminelëve, në mënyrë që ta shpëtojë familjen e tij.
McMurray është duke e shkruar skenarin, do ta bëjë regjinë e filmit si dhe do të shërbejë si producent i tij, përmes kompanisë së re filmike të cilën e ka themeluar së fundmi, “Buppie Productions”.
De Niro, Jane Rosenthal dhe Berry Welsh po ashtu shërbejnë në rolin e producentëve të këtij projekti.
Puna rreth realizimit të filmit “The Formula” nuk pritet të fillojë deri sa, Boyega dhe De Niro, të mos i përfundojnë projektet në të cilat janë duke punuar aktualisht.
John Boyega së shpejti vjen në ekran të madh me komedinë fantastiko-shkencore, “They Cloned Tyrone”, derisa Robert De Niro është angazhuar me rol në filmin e ri të David O. Russellit, ku do të luajnë krahas aktorëve Christian Bale dhe Margot Robbie.
