Kontrata e Charles Leclerc me Ferrarin skadon në vitin 2024 dhe tashmë kanë nisur zërat se rinovimi mes palëve ka “ngecur”.
Pakënaqësitë e skuderisë italiane me pilotin monegask janë shprehur në disa raste edhe publikisht, megjithatë në fund nuk është besuar asnjëherë se “krisja” mund të jetë aq e madhe se 25-vjeçari të mos rinovojë me italianët.
Vetë Leclerc shprehet se është gati të vazhdojë aventurën me “kokëkuqjen”, mirëpo shprehet se është i pasigurt për qëllimet e Ferrarit.
“Nuk kam nënshkruar asnjë kontratë rinovimi. Është përfolur për një shifër prej 200 milionë eurosh.
Eh, sikur ta kisha firmosur një kontratë të tillë, më duket një akord i shkëlqyer. Por, dua të theksoj se nuk ka ende rinovim dhe për momentin nuk ka as bisedime lidhur me këtë temë.
E sigurt është se në një moment të caktuar duhet të ulemi dhe të flasim, ndoshta në fundin e këtij sezoni.
Qëllimi im është të vazhdoj me Ferrarin, por nuk di cili është qëllimi i skuderisë.
Por, nuk jam i shqetësuar dhe tani nuk mendoj për këtë temë, jemi në mesin e sezonit. Duhet të punojmë fort që të jemi të paktën aq të mirë sa në sezonin e kaluar. Duhet të rikthehemi në gjendje për të tentuar fitoret”, u shpreh Leclerc.
