Të hënën, Kosova e zhvillon ndeshjen e radhës për kualifikimet e Kampionatit Evropian ndaj Malit të Zi.
Ndeshja do të luhet në stadiumin “Fadil Vokrri” në Prishtinë, duke filluar nga ora 20:45. Tifozëria e Kosovës “Dardanët” sot kanë bërë një njoftim të rëndësishëm për anëtarët e tyre.
“Dardanët” pos tjerash kanë shkruar se nuk do ta ofendojnë kundërshtarin.
Njoftimi i plotë i “Dardanëve”
Të hënën me 14 tetor, në stadiumin ‘Fadil Vokrri’ Kosova përballet me Malin e zi, ndeshje kjo që mund të jetë vendimtare për rrugëtimin e Kosovës në Euro2020.
Me besimin në fitore, ne Dardanët, do t’i përkrahim djelmoshat tanë prej sekondës së parë e deri në fund.
Me besimin se kështjella e quajtur ‘Fadil Vokrri’ mbetet e pamposhtur, ne do të jemi lojtari i 12-të i Kosovës.
Me besimin në djemtë tanë në krye me Challandes, nuk do të ndalemi së brohorituri. Njëkohësisht, siç e kemi traditë, nuk do ta ofendojmë kundërshtarin.
Kemi dhënë besën. Për Kosovën, dashurinë tonë të përjetshme.
Të gjithë anëtarët e tifo-grupit ftohen të tërhekin biletat e tyre deri ditën e dille. Biletat janë vetëm për anëtar.