Mark Overmars dha dorëheqjen nga posti i drejtorit të kampionëve holandez të Ajaksit pasi pranoi se kishte dërguar mesazhe të papërshtatshme disa kolegeve. 48-vjeçari lançoi një deklaratë për kanalin zyrtar të “harkëtarëve” se i vjen turp nga sjellja e tij dhe se kërkon falje:
“Më vjen turp! Javën e kaluar u përballa për sjelljen time. Fatkeqësisht, nuk e kuptova që po e kaloja kufirin me këtë, por kjo m’u bë e qartë ditët e fundit.
Papritmas ndjeva presion të madh. Kërkoj falje. Sigurisht që për dikë në pozicionin tim kjo sjellje është e papranueshme. Edhe unë tani e shoh këtë. Por është tepër vonë.
Nuk shoh zgjidhje tjetër veç të largohem dhe të jap dorëheqjen nga klubi i Ajaksit. Kjo gjithashtu ka një ndikim të madh në situatën time private.
Prandaj u kërkoj të gjithëve të më lënë vetëm mua dhe familjen time.”, përfundoi Overmars i cili filloi si drejtor te klubi i madh holandez një dekadë më parë.
