Ministria e Kulturës, Rinisë dhe Sportit ka dënuar ashpër dhunën ndaj portierit të Ballkanit, Stivi Frashërit, në Gjilan.
Në njoftimin e tyre bëjnë të ditur se për ditën e nesërme është ftuar mbledhje e Këshillit Kombëtar për Parandalimin e Dhunës në Sport për t’i shqyrtuar veprimet e radhës.
MKRS thotë se janë të përkushtuar të bëjnë gjithçka munden për t’i mbajtur huliganët jashtë fushave të sportit.
“Ministria e Sportit dënon ashpër dhunën e ushtruar ndaj portierit të Ballkanit, Stivi Frashëri dhe gjithë situatën e krijuar në ndeshjen e futbollit Gjilani – Ballkani. Këto pamje nuk përkojnë me frymën sportive dhe të gjithë përgjegjësit do të marrin përgjigjen e merituar.
E falënderojmë Policinë e Kosovës për reagimin e tyre të shpejtë në arrestimin e të dyshuarve. Për ditën e nesërme kemi ftuar mbledhje të Këshillit Kombëtar për Parandalimin e Dhunës në Sport për t’i shqyrtuar veprimet e radhës.
Jemi të përkushtuar të bëjmë gjithçka mundemi për t’i mbajtur huliganët jashtë fushave të sportit.
Portierit Stivi Frashëri i urojmë shërim të shpejtë dhe të plotë”, thuhet në njoftim.
