Golashënuesi më i mirë i të gjitha kohërave i Manchester United, Wayne Rooney, i ka bërë thirrje trajnerit të “Djajve të Kuq”, Erik ten Hag, që të largojë Cristiano Ronaldon dhe Marcus Rashfordin nga formacioni për ndeshjen e së hënës në Premier Ligë kundër Liverpoolit.
20 herë kampionët e Anglisë do të përpiqen të shmangin humbjen e tretë radhazi në fillim të sezonit 2022-23, kur ata mirëpresin rivalët e tyre të hidhur në “Old Trafford”.
Ronaldo është në garë për t'u paraqitur në majë të sulmit, pavarësisht spekulimeve të vazhdueshme rreth të ardhmes së tij, ndërsa Rashford ka të ngjarë të ruajë vendin e tij në të majtë.
Megjithatë, Rooney ka thënë se energjia do të jetë kyçe ndaj skuadrës së Jurgen Klopp dhe trajneri i DC United ka thënë se nuk do të luante as me Ronaldon, as me Rashfordin nga fillimi.
“Unë nuk do të luaja me Cristiano Ronaldon dhe nuk do të luaja as me Marcus Rashfordin”, shkroi Rooney në rubrikën e tij për “The Times”.
“Nëse do të isha në pozicionin e Ten Hag, shqetësimi im kryesor do të ishte marrja e energjisë në fushë, dhe dështimi i United për të rekrutuar numrin nëntë do të thotë se ata u mbështetën te Ronaldo kundër Brentfordit, edhe pse ai nuk ishte stërvitur shumë me ekipin.
“Ai dukej sikur i duhet kohë për t'u përshtatur në ndeshje. Ten Hag ka nevojë për energji nga ana e tij dhe kjo mund të nënkuptojë heqjen e Ronaldos. Sa i përket Marcus, mendoj se ai duhet të bëjë shumë më shumë dhe të kuptojë se çfarë dëshiron, për të mirën e tij, para çdo gjëje tjetër.”, tha anglezi në fund.
Ndeshja ndërmjet Manchester United dhe Liverpoolit zhvillohet të hënën nga ora 21:00.
