Tifozët e Juves e kanë akuzuar se nuk ka qenë dhe nuk do të jetë kurrë një lider, ndërsa mbrojtësi Leonardo Bonucci u është përgjigjur nga konferenca për shtyp me Kombëtaren Italiane, në prag të sfidës ndaj Anglisë në “San Siro”.
Futbollisti deklaroi se mosmirënjohja e ka shoqëruar shpesh gjatë viteve të karrierës së tij dhe se tashmë nuk i bën më përshtypje, teksa theksoi se vijon të ndihet njësoj e të bëjë më të mirën në fushë.
“Po të ishte diçka e viteve të fundit edhe mund të më surprizonte, por mosmirënjohja ndaj asaj që kam bërë në fushë, më ka shoqëruar prej shumë kohës. U bënë shumë vite që ndodh e njëjta gjë, por unë ndihem njësoj dhe jam gjithmonë maksimumin, sa herë që zbres në fushë, qoftë me Juven, qoftë me Italinë”, u shpreh Bonucci.
Me Chiellinin që vendosi të tërhiqej, rolin e liderit në prapavijën e Italisë, ka marrë përsipër ta bëjë pikërisht futbollisti i Juventusit, që gjithsesi pranon se nuk do të vazhdojë edhe shumë gjatë në Kombëtare.
“Botërori 2026 nuk është një objektiv i imi. Unë jam në kombëtare dhe do të vazhdoj të jem, për sa kohë që luaj futboll dhe Mancini ka nevojë që të jem i pranishëm me eksperiencën time”, u shpreh Bonucci.
