Një nga pikat ku Vllaznia la shumë për të dëshiruar në 15 javët e këtij sezoni ishte sulmi. Duke përjashtuar takimin e fundit, skuadra shkodrane kishte një mesatare prej vetëm 1 goli të shënuar për ndeshje.
Nisur nga kjo, kërkimi për një sulmues në janar është diçka urgjente. Por, ndoshta drejtuesit e klubit nuk do të kërkojnë larg për të bërë një afrim të tillë.
Rubin Hebaj, i cili në ditët e ardhshme pritet të zyrtarizojë largimin nga Teuta, është një opsion për Vllazninë. Ai ka dalë nga akademia e kuqebluve dhe në Durrës ka treguar se di të zgjidhë ndeshje me golat e tij.
Në Shkodër ai gjen një ekip akoma më cilësor se në Durrës dhe kjo padyshim e ndihmon të ketë më shumë situata para portës.
Gjithsesi, për momentin gjithçka është në kuadrin e hipotezave, pasi duhet pritur janari për të parë lëvizje të konkretizuara.
