Nottingham Forest do të luajë gjysmëfinalen e Carabao Cup pa portierin titullar për shkak të rregullit që ndalon një lojtar të huazuar të luajë kundër ekipit që mban kartonin e tij. United mund të thotë po, por…
Shorti i Carabao Cup ka përcaktuar gjysmëfinalet e Kupës së Ligës angleze. Nga njëra anë është Southampton, i cili mposhti City-n e Guardiola-s, i cili do të përballet me Newcastle, me bardhezinjtë që kanë mposhtur Leicester-in.
Dhe nga ana tjetër, ka një ndeshje që do të vërë në fushë… shumë trofe, duke filluar me pesë Champions League: tre për Manchester United dhe dy për Nottingham Forest.
Djajtë e Kuq kaluan duke mundur Evertonin, ndërsa Forest ka vuajtur më shumë, duke fituar çerekfinalen kundër Wolves vetëm me penallti, falë pritjeve të Dean Henderson. Ky i fundit, megjithatë, në gjysmëfinalen e dyfishtë me United… nuk do të luajë.
Asnjë skualifikim apo dëmtim, por siç shpjegon The Sun, një rregull i kompeticionit. Pak si ajo që në Spanjë njihet si klauzola e “miedo-s”, e frikës, vendimi që pengon një lojtar të huazuar të luajë kundër ekipit që zotëron kartonin e tij.
Pra, Henderson, i cili u largua nga Old Trafford në verë i zhgënjyer pasi, sipas tij, klubi nuk e respektoi premtimin për t’i dhënë minuta në fushë, do të duhet ta shikojë ndeshjen nga tribuna, siç ka ndodhur tashmë në kampionat, kur në vend të tij në portë ishte Wayne Hennessey.
Realisht do të ekzistonte edhe mundësia që Henderson të dilte në fushë, por gjithçka varet nga vullneti i Manchester United. Djajtë e Kuq, nëse do të dëshironin, mund t’i jepnin edhe leje futbollistit për të luajtur, por duke pasur parasysh se janë në kërkim të një trofeu që i mungon që nga viti 2017, viti i fitores së Europa League me Josè Mourinhon në stol, nuk ka gjasa që Ten Hag të japë ‘ok’.
Një situatë që… ia hoqi gëzimin e fitores trajnerit të Forestit, Steve Cooper. “Unë e kam menduar vetëm tani këtë, është zhgënjyese. Është një situatë fatkeqe. Dean është pjesë e grupit, jo vetëm që është i përkushtuar dhe punon shumë, por ai vlerëson qytetin dhe gjithçka nga klubi”.
