Lorenc Trashi zgjedh Ballkanin për të vijuar karrierën. Mbrojtësi 30-vjeçar i Kombëtares Shqiptare ishte i lirë prej fundit të dhjetorit, pasi i përfundoi kontrata me klubin e Al Qadsia në Kuvajt.
Për Trashin shfaqën interes shumë skuadra, por në fund futbollisti zgjodhi kampionët e Kosovës, ku do të punojë nën urdhrat e trajnerit Ilir Daja.
SuperSport mëson se palët kanë arritur marrëveshjen për një kontratë 1.5 vjeçare, nga e cila Trashi do të përfitojë rreth 7 mijë euro në muaj.
Një rol mjaft të rëndësishëm në këtë transferim ka luajtur edhe Nderim Nexhipi, të cilin Trashi e ka pasur shok skuadre te Partizani dhe që aktualisht mban postin e drejtorit sportiv te Ballkani.
Lorenc Trashi pritet të fluturojë nesër drejt Antalias, për t’u bashkuar me kampionët e Kosovës, të cilët po zhvillojnë fazën përgatitore në tokën turke.
