Destiny Udogie është një nga lojtarët që po bëjnë emër në futbollin italian.
Futbollisti është pjesë e Udinezes, i huazuar nga Totenhem i cili e bleu për 20 milionë euro nga ky klub duke fituar garën për 20-vjeçarin me klubet të tjera të njohura që po e ndiqnin me vëmendje lojtarin e U21 të Italisë.
Por Udogi sot nuk është bërë protagonist në mediat italiane për atë që ka treguar në fushën e lojës, por për një aksident që ka shkaktuar me makinë, për fat të mirë pa viktima dhe nga i cili nuk ka pësuar edhe vetë dëme që mund të penalizonin karrierën e tij.
Ai raportohet se rreth orës 3 të mëngjesit, është përplasur me makinën e tij, duke shkatërruar një lokal.
Futbollisti bëhet e ditur se ka humbur kontrollin dhe ka hyrë me makinë në lokal, duke shkatërruar tavolina, karrige e disa çadra të vendosura në pjesën e jashtme të tij. Policia ka mbërritur menjëherë në vendngjarje, por nuk e ka çuar në spital dhe as nuk e ka arrestuar, duke kryer gjithsesi testet e alkoolit dhe kontrollet e rastit.
Tani pritet që ndaj tij të ketë kallëzim penal pasi ka shkaktuar dëme për mijëra euro, përtej faktit që ka prishur makinën e tij Mercedes, ashtu si edhe masa disiplinore nga Udineze e pse jo, edhe Totenhem që zotëron kartonin e anësorit ofensiv.
