Mason Greenwood aktualisht po njihet me mjedisin e tij të ri në Spanjë pasi iu bashkua skuadrës së La Liga-s, Getafe, në ditën e fundit të merkatos.
Nga këndvështrimi i tij, do të jetë një mundësi për të rinisur karrierën e tij, pasi për herë të fundit ka luajtur në një ndeshje zyrtare në janarin 2022.
Greenwood u akuzua për dhunë ndaj ish-të dashurës. Më pas ai u arrestua dhe doli në gjykatë, me Manchester United që e pezulloi atë për një kohë të pacaktuar. Çështja e tij u pushua më 2 shkurt të këtij viti.
United i rezistoi tundimit për ta kthyer atë në skuadër menjëherë dhe në vend të kësaj ndërmori një hetim të brendshëm që zgjati mbi 6 muaj.
Drejtori i Përgjithshëm i klubit, Richard Arnold, zbuloi në fund të muajit të kaluar se 21-vjeçari nuk do të luajë më për klubin në një komunikatë të hapur për tifozët e klubit.
Kontrata e sulmuesit, e cila zgjat deri në vitin 2025, megjithatë nuk u ndërpre, me klubin që premtoi se do ta ndihmonte të rifillonte karrierën e tij larg Old Trafford. Kjo ndihmë erdhi në formën e sigurimit të një lëvizjeje huazimi te Getafe.
Marrëveshja do të bëjë që anglezi të kalojë sezonin në Spanjë, me United që mbulon një pjesë të madhe të pagës së tij javore prej 75,000 euro. Getafe gjithashtu nuk pranoi të paguante një tarifë për huazimin.
Megjithatë, siç raporton Athletic, adoleshenti mund të rikthehet në Mançester në janar nëse marrëveshja e huazimit nuk shkon siç pritet.
Getafe ka përfshirë një ‘klauzolë pushimi’ në marrëveshje, që në thelb do të thotë se mund të anulohet nëse njëra nga palët nuk është e lumtur. Klauzola është praktikë standarde për shumë marrëveshje huazimi në futboll.
