Italia ndërron trajner, por jo skemë loje, teksa edhe Luçiano Spalletti duket i bindur të vijojë me rreshtimin 4-3-3 të përdorur nga Mançini, aq më tepër që kjo mënyrë loje është e preferuar edhe për trajnerin toskan.
Gjatë këtyre ditëve Spalletti ka bërë prova të shumta, sidomos për krahët e sulmit, por edhe në qendër, ku i favorizuar duket se është Raspadori, sulmues i Napolit, që njeh mirë kërkesat e trajnerit për atë rol.
Në krah janë provuar futbollistë të ndryshëm, por gjasat janë që të jenë Kieza e Zaniolo ata që do të luajnë titullarë në krah të sulmuesit kryesor, teksa në repartet e tjera ka pak dilema.
Kështu në portë do të konfirmohet Donarumma, ndërsa në mbrojtje Di Lorenzo në krah të djathtë, Skalvini e Bastoni në qendër dhe Dimarko në krahun e majtë.
Në mesfushë janë të konfirmuar Barella e Tonali, teksa para mbrojtjes gjasat janë që të luajë njëri mes Lokatellit dhe Kristantes. Italia do të luajë ndaj Maqedonisë së Veriut dhe Ukrainës në dy ndeshje eliminatore për “Gjermani 2024".
