Tirana e rrjetës për femra, tashmë me lojtare të huaja, sfidon pretendentët
Hasan Gurabardhi, trajneri i Tiranës në volejboll për femra, është kthyer në krye të bardhebluve pas 11 vitesh.
\Për herë të fundit ishte në krye të kësaj skuadre në sezonin 2011-2012 dhe duke vlerësuar rolin e sekretares së klubit shumësportësh Tirana, Deborah Keçi, tregon dhe përvojën e tij të re.
"U ndjeva mirë, sepse mosha bën të veten. Por ti e di që kam patur kujtime shumë të mira nga Tirana.
Ndoshta kam dhe një peng që ka humbur një titull kampion Tirana pas largimit tim.
Kjo ka ndodhur një muaj e gjysëm para përfundimit të kampionatit më 2012-ën. Dhe unë dua ta rikthej atë", thotë Gurabardhi.
Tirana humbi në gjysmëfinalen e Kupës së Federatës Shqiptare të Volejbollit, 1-3 me Skënderbeun, dhe fitoi në javën e parë të kampionatit, 3-0 ndaj Pogradecit. Ja se si e sheh skuadrën Gurabardhi, tashmë me lojtare të huaja në skuadër.
"Normalisht e humbëm. Por edhe atë ditë u treguam dinjitoz sepse me një pasuese me perspektivë si Ibrahimi qëndruam fort dhe rivalë të denjë. Por ekipi është shumë i mirë. Përveç organizatores senegaleze ka ardhur dhe një shutere kubaneze. Kemi Brahon, por dhe një grup lojtaresh me perspektivë", shpjegon Gurabardhi.
Ndeshja e radhës për bardheblutë do të jetë me Teutën në sallën sportive “Farie Hoti” në ora 17:00 të premten.
Fitorja jo vetëm e ndeshjes, por e të gjitha trofeve ky është objektivi i Gurabardhit.
"Ne jemi përgatitur për ta fituar ndeshjen sepse po të jesh tek Tirana duhet të jesh i përgatitur për të marrë trofe.
Që do të thotë fitorja e kampionatit, trofetë e të tjerë. Sepse unë me atë objektiv po shkoj", përfundoi i pari i pankinës së Tiranës në volejboll për femra.
