Shkëndija të mërkurën në Tetovë përballen me Struga Trim&Lum në duelin e shtyrë të xhiros së dytë të Maqedonisë së Veriut, që duhej të luhet më 13 gusht.
"Shkëndija do të jetë aktive edhe në mesjavë kur do të luajmë duelin e prapambetur nga xhiroja e dytë e Ligës së Parë të Futbollit të Maqedonisë. Të mërkurën në Tetovë ndeshemi me Strugën në duelin e xhiros së dytë të Ligës së Parë. Takimi ishte programuar për datën 13 gusht, mirëpo i njejti u shty me kërkesë të struganëve shkaku i angazhimeve në Kupat e Evropës.
Kuqezinjtë me fitore eventuale kthehen në pozitën e parë në renditje, pasi momentalisht jemi në vend të dytë me një ndeshje më pak. Të dielën barazuam 2:2 në transfertën me Gostivarin dhe tani synojmë fitore të re si vendas ku paraprakisht këtë sezon kemi 2 fitore dhe një barazim.
Struga Trim&Lum vjen në Tetovë pasi në fundjavë u mund 2:0 nga Shkupi. Pesë fitore dhe dy humbje në 7 takime e lënë Strugën në kuotën e 15-të pikëve që i mban në pozitën e katërt në renditje.
Pa lëndime dhe pezullime, trajneri Nuhiu ka në dispozicion të gjithë futbollistët (pa llogaritur Merxhanin dhe Ramadanin të lënduar më gjatë)", njofton Shkëndija.
Përballja Shkëndija-Struga T&L zhvillohet të mërkurën me fillim në orën 14:00 në stadiumin e qytetit në Tetovë.
