Interi fitoi në Torino dhe u rikthyer në krye të renditjes së Serisë A për të paktën 24 orë. Pas një pjese të parë të vështirë, zikaltrit mposhtën ekipin Granata në pjesën e dytë falë golave të Thuram, Lautaro Martinez dhe Calhanoglu.
Pak para se skuadra e Simone Inzaghit të kalonte në avantazh, ndodhi një episod që shkaktoi shumë diskutime për arsye të ndryshme. Peer Schuurs, mbrojtësi i Torinos, dëmtoi gjurin e tij pasi vendosi keq këmbën pas një ndërhyrjeje nga Hakan Calhanoglu në mesfushë.
Kjo situatë u kthye në një çështje në rrjetet sociale ku përfshihet Nicolò Barella, i cili u ndëshkua me karton të verdhë për protesta nga arbitri Matteo Marchetti pas faullit të dhënë nga ky i fundit.
Mesfushori italian nuk e priti mirë ndërhyrjen e arbitrit pasi sipas tij kontakti mes shokut të skuadrës dhe Schuurs nuk ishte për t’u ndëshkuar, por ai protestoi në mënyrë të dukshme dhe kështu në mënyrë të pashmangshme iu dha kartoni i verdhë.
Në orët në vijim, lojtari i Inter-it u vu në shënjestër fillimisht si autor i faullit që solli dëmtimin e Schuurs dhe më pas për sjelljen e tij, të cilësuar nga shumë njerëz jo të “përshtatshme” në një moment të tillë.
Lojtari i Torinos u largua me barelë dhe vetë Barella iu afrua për t’u interesuar për gjendjen e tij, siç shihet edhe nga fotoja e publikuar nga DAZN.
Pak minuta më vonë mesfushori i Interit u zëvendësua nga Simone Inzaghi dhe Barella, bëri një gjest falje ndaj trajnerit kundërshtar Ivan Juric teksa largohej duke thënë: “Nuk e kisha parë”.
