Agjenti i Thiago Motta-s kundërshton ashpër zërat në lidhje me një lëvizje të mundshme te Napoli të klientit të tij në fund të sezonit. “Thiago nuk e di ende të ardhmen e tij, por sigurisht që nuk do të jetë te Napoli, – shpjegoi Dario Canovi për “Radio Kiss Kiss Napoli”.
– Ai nuk do të vinte te Napoli edhe nëse De Laurentiis do të blinte Zirkzee dhe Calafiori prej tij. Motta ka plane të tjera për të ardhmen e tij”.
Deklaratat që i lënë pak hapësirë skuadrës italiane nga njëra anë dhe nga ana tjetër i lënë të hapura opsionet e tjera trajnerit “rossoblù”.
Nisur nga puna e bërë në Bologna, për Thiago Motta, për momentin radha e klubeve të interesuara për sezonin e ardhshëm është e gjatë. Duke lënë mënjanë Napolin, i cili dukej në “pole position” pas shkarkimit të Garcia dhe punësimit të përkohshëm të Mazzarrit, në Itali janë mbi të gjitha skuadrat e tjera që po vëzhgojnë me shumë vëmendje situatën e ish-trajnerit të Genoa dhe Spezia.
Milani dhe Juve mbeten gjithmonë vigjilentë për të vlerësuar alternativat në rast lamtumire të Massimiliano Allegrit apo Stefano Piolit.
Opsione shumë tërheqëse për Thiago Motta, i cili në këtë mënyrë mund të bëjë një hap para në cilësi për të provuar të demonstrojë aftësitë e tij në një nivel tjetër, jo vetëm në Serie A, por edhe në Evropë. E njëjta gjë vlen edhe për Barcelonën, një tjetër klub i interesuar dhe destinacion i profilit të lartë, që do ta katapultonte Motta-n në rrethin e vogël të trajnerëve më të mirë në qarkullim.
