Pronari i Milanit, Gerry Cardinale i ka lënë dorë të lirë ish-sulmuesit kuqezi, Zlatan Ibrahimoviç dhe ky i fundit ka nisur menjëherë nga puna për të përforcuar bordin drejtues të skuadrës.
Kështu media në Itali raporton se Ibra ka vendosur të sjellë në zyrat e Milanit Jovan Kirovskin, ish- drejtuesit e Los Angeles Galaxy, i cili bëri të mundur transferimin e sulmuesit suedez nga Manchester United te klubi i MLS-së në 2018-ën.
Kirovski është larguar nga klubi amerikan në janar të këtij viti dhe Ibra duket i vendosur ta sjellë te Milani, ndonëse mbetet ende i paqartë roli që 48-vjeçari do të marrë në klubin kuqezi.
Ai mësohet se është takuar shpesh me Ibrën javët e fundit dhe madje ka ndjekur disa ndeshje të Milanit në tribunën e “San Siros”, ndaj zyrtarizimi pritet të vijë brenda pak javësh.
Me këtë lëvizje, Ibrahimovic tregon se e ka marrë seriozisht eksperiencën e tij të re te Milani dhe kërkon të ketë njerëzit e tij mes drejtuesve të lartë të klubit, në mënyrë që ta ketë më të lehtë menaxhimin.
