Mesfushori i Shpresave të Shqipërisë, Tim Civeja, po shkëlqen në këtë edicion në radhët e klubit të Sarbruken në kategorinë e tretë gjermane,
Djaloshi shqiptar po bëhet vazhdimisht vendimtar me golat dhe asistet e tij, teksa sot ka kombinuar të dy statistikat për t’i dhënë suksesin 2-1 ekipit ndaj Unterhaking.
I rreshtuar mes titullarëve, Civeja në minutën e 33-të të ndeshjes shënoi golin e barazimit të përkohshëm 1-1 me një gjuajtje brenda zonës së rreptësisë. Ndërkohë, në minutën e 49-të të takimit, ai dha një harkim perfekt për Keber i cili shënoi me kokë golin e fitores 2-1 për skuadrën e tij.
Sarbruken është në mesin e tabelës së renditjes dhe nuk ka shanse të ngjitet në Bundesligën 2 në këtë edicion.
Por për të gjithë do të mbetet e paharrueshme ecuria e tyre në Kupën e Gjermanisë ku arritën deri në gjysmëfinalet e turneut pasi eliminuan skuadra si Bajern Mynih dhe Eintraht Frankfurt..
