Arsenali, 190 milionë euro për të përforcuar sulmin!
Alexander Isak i Newcastle është objektivi kryesor i merkatos së Arsenalit për sa i përket sulmit. Lajmi është bërë i ditur prej disa kohësh, por “The Guardian” sot ofron disa lajme për këtë çështje.
Sipas tabloidit anglez, “topçinjtë” do të ishin të gatshëm të paguanin deri në 115 milionë euro për të rrëmbyer nga rivalët e tyre ish-lojtarin e Borussia Dortmundit. Kjo shifër do të zgjidhte edhe problemet e likuiditetit të Newcastle.
Arsenali po ndjek me vëmendje edhe Michael Olise, anësori anglo-francez i lindur në 2001, që luan për Crystal Palace (6 gola dhe 3 asistime në 13 ndeshje) për të cilin mund të shpenzohen prej rreth 75 milionë euro, pavarësisht se ka pasur probleme të shumta fizike këtë sezon, të cilat e detyruan të humbiste më shumë se gjysmën e sezonit.
