Policia Rajonale e Gjakovës kanë bërë të ditur se ministri i Shëndetësisë, Armend Zemaj është dashur që të komunikojë me drejtorin e Policisë së Kosovës, Rashit Qalaj për t’i shpërndarë mbi 500 persona që janë grumbulluar tek Ura e Shenjtë në Gjakovë.
Sipas të njëjtave burime, Qalaj pas bisedës me ministrin e Shëndetësisë ka kërkuar nga Policia Rajonale e Gjakovës për ta shpërndarë turmën e krijuar.
Rastin për media e ka konfirmuar drejtori i Policisë për Regjionin e Gjakovës, Lumni Graishta, i cili ka thënë se ky eveniment ishte lejuar nga Qendra Operative e Ministrisë së Punëve të Brendshme.
Sipas tij, mbi 500 persona janë shpërndarë nga Policia e Kosovës tek Ura e Shenjtë në Gjakovë, ku ishte duke u organizuar kërcimi nga kjo urë.
“Ajo çka unë mundem me thënë është që organizimi i kërcyesve ka qenë i aprovuar nga Qendra Operative e Ministrisë së Punëve të Brendshme në kuadër të disa aktiviteteve që lejohen në ambiente të hapura. Përkundër prezencës policore, numri i pjesëmarrësve ka qenë më i lartë sesa lejohet, nuk janë respektuar masat e nevojshme dhe rekomandimet e IKSHPK-së dhe ne kemi urdhëruar që të shpërndahen. Kanë qenë mbi 500 persona”, ka thënë Lumni Graisha,
Gazeta Sinjali ka provuar disa herë që ta kontaktojë ministrin e Shëndetësisë, Armend Zemaj dhe drejtorin e Policisë, Rashit Qalaj, por të njëjtit nuk kanë qenë të qasshëm.