Shërbimi Spitalor dhe Klinik Universitar i Kosovës (SHSKUK) dhe Shoqata Medica nga Gjakova, nënshkruan sot marrëveshje bashkëpunimi për lehtësimin e ofrimit të shërbimeve mjekësore për të mbijetuarat nga dhuna seksuale gjatë luftës në Kosovë.
Marrëveshja u nënshkrua nga drejtori i Përgjithshëm i SHSKUK-së, Basri Sejdiu, dhe drejtoresha ekzekutive e Medica Gjakova, Mirlinda Sada.
Qëllimi i përgjithshëm i marrëveshjes është zbatimi i projektit “Përmirësimi i shërbimeve dhe kujdesit shëndetësor te gratë dhe vajzat me trauma të mbijetuara të dhunës në baza gjinore dhe të dhunës seksuale gjatë luftës së fundit në Kosovë”.
Projekti synon forcimin e kapaciteteve të ofruesve të shërbimeve shëndetësore publike për këtë kategori.
Zbatimi do të fillojë në komunën e Gjakovës dhe Prizrenit. Kjo marrëveshje lidhet për një periudhë dyvjeçare, me mundësi vazhdimi dhe hyn në fuqi me datën e nënshkrimit të saj nga të dyja palët.