Të qetë qëndruan për tetë ditë. Brenda kësaj periudhe kohore nuk pati asnjë të prekur me virusin korona në Gjilan. Por, ky trend pozitiv u prish të dielën.
Në komunën më të madhe të Anamoravës, pas analizave të Institutit Kombëtar të Shëndetit Publik, rezultuan 9 raste pozitive. E burimi i infeksionit tashmë është identifikuar.
Nga Komuna e Gjilanit, njoftojnë se të gjitha raste burim infeksioni e kanë një klinikë privatë në Prishtinë.
Ndërsa bëhet fjalë për familjen e ngushtë të infermieres dhe disa pjesëtar të repartit të pediatrisë në Spitalin e Gjilanit.
Nënkryetari i Gjilanit, Arbër Ismajli thotë se kjo është hera e katërt që Gjilani ballafaqohet me raste të bartura nga qytetet e tjera.
Ndërsa ka treguar se deri më tani, gjithsej në këtë komunë janë shënuar 61 raste me virusin korona.
Ndërkohë, rikthimi i këtij virusi në Gjilan duket se ka ndikuar në rënien e qarkullimit të qytetarëve.
Banorët e kësaj komune thonë se ende duhet të vazhdojë kujdesi, në luftimin e kësaj pandemie.
Përveç 5 familjeve që po qëndrojnë në izolim nga rastet e fundit pozitive, është edhe një familje tjetër në karantinë, nga rastet e kaluara.
Ndërkohë, nga Komuna e Gjilanit, përveç ndihmave për qytetarët dhe familjet e prekura, planifikon t’i shpërndajë edhe 200 bluza, me emrat e të gjithë donatorëve dhe bamirësve, që kontribuuan në luftimin e covid 19.
