Nënkryetari i Podujevës, Nexhmi Rudari, ka kërkuar nga qytetarët të respektojnë masat në mënyrë strikte në mënyrë që të shmangun mbylljen totale.
Ai këtë e bëri të ditur përmes Facebook, duke treguar se edhe në takim virtual më kryetarët e komunave ka paraqitur shqetësimin e tij në lidhje me masat e ndërmarra për mbylljen totale të bizneseve për fundjavë, me theks sektorin e gastronomisë.
Postimi në Facebook:
Të dashur qytetarë,
Në lidhje me situatën epidemiologjike dhe për të diskutuar zbatueshmërinë dhe efektet e masave anti-Covid, sot është zhvilluar takim virtual mes kryetarëve të komunave dhe ministrit të Shëndetësisë Armend Zemaj.
Në këtë takim kam paraqitur shqetësimin tim në lidhje me masat e ndërmarra për mbylljen totale të bizneseve për fundjavë, me theks sektorin e gastronomisë.
Jam i vetëdijshëm se komuna jonë është ndër komunat me numër të madh të rasteve, të cilat janë rritur shumë ditëve të fundit. Mirëpo, sektori i gastronomisë është zinxhiri, i cili vendos në funksion edhe shumë veprimtari të tjera.
Ndaj, kam kërkuar që të kërkohet respektim strikt i masave anti-Covid dhe të shmanget mbyllja totale, siç u praktikua këtë fundjavë.