Një digë e madhe do të ndërtohet në grykën e Drinit të Bardhë në Dobrusht të Prizrenit.
Ajo do të jetë pjesë e hidrocentralit “EcoDri” që planifikohet të realizohet në lumin më të madh në Kosovë, nga kompania me të njëjtin emër.
Shfrytëzimi i kësaj rrjedhe për prodhim të rrymës po shihet me shqetësim nga shoqëria civile për shkak të degradimit të mjedisit. Ndër ta, edhe nga Federata e Peshkatarëve të Kosovës.
Bashkim Krasniqi thotë se hidrocentrali e dëmton faunën dhe e degradon mjedisin.
Kundër prodhuesit energjetik janë edhe nga opozita lokale e Prizrenit. Shaqir Totaj nga Partia Demokratike e Kosovës thotë se do ta kundërshtojnë çdo nismë që mund ta dëmtojë ambientin.
Veshët zgjatur i kanë edhe banorët përreth, pasi nuk e dinë nëse projekti gjigant do ta dëmtojë zonën. Për ta, kompania “EcoDri” dhe Ministria e Ambientit ka thirrur dëgjim publik më 25 shkurt. Takimin e organizon Komuna e Prizrenit, kryetari i së cilës shprehet se nuk di gjë për planin e hidrocentralit.
Por, Mytaher Haskuka thotë se do ta kundërshtojnë ndërtimin nëse konstatojnë se projekti është i dëmshëm.
Haskuka me gjasë nuk e ka lexuar raportin 87 faqësh të publikuar në faqen e ministrisë. Këtu thuhet se hidrocentrali do të jetë në favor të prodhimit dhe nuk do ta dëmtojë shumë mjedisin. Derisa projekti parasheh shfrytëzimin e 80% të rrjedhës.
Drejtoresha e EcoDrinit, Rreze Bërdynaj, nuk pranoi të prononcohet, vetëm se në telefon tha se do të telefonojë kur ta shohë të arsyeshme.
Hidrocentralet janë industri e re në vend. Por, kjo është kundërshtuar vazhdimisht nga avokuesit ekologjikë. Disa prej tyre që janë kundërshtuar më së shumti janë ata të Deçanit dhe Shtërpcës.
