Kryesindikalisti i arsimit Rrahman Jasharaj kërkesën për t’u vaksinuar mësimdhënësit e përsëriti shpesh qysh kur numri i vaksinave anti-COVID ishte goxha i kufizuar në Kosovë.
Madje kryetari i Sinidkatës së Arsimit Rrahman Jasharaj disa herë i bëri thirrje Qeverisë që punëtorët arsimorë t’i trajtojë me prioritet sa i përket imunizimit.
Por, tash që kushtet janë krijuar për të marrë vaksinën gjithë mësimdhënësit, vetëm 7200 nga rreth 26 mijë sosh e kanë shfrytëzuar këtë mundësi.
Prandaj, zëvendësministri i Arsimit, të premten nëpërmjet një konference për media të gjithë mësimdhënësve u bëri thirrje që të vaksinohen në mënyrë që procesi mësimor të fillojë i rregullt në muajin shtator.
Prej fillimit të vaksinimit në të gjitha qytetet e Kosovës janë dhënë 343.333 doza të vaksinës.
