Komuna e Podujevës planifikon ndërtimin e një parkingu nëntokësor në qytet, pasi nuk ka shumë vende për parkim dhe qytetarët mund të shfrytëzojnë parkingun në qendër për t’i kryer punët e tyre në qytet.
Fatri Zhitia, zëdhënës në komunën e Podujevës, për RTV Dukagjini ka thënë se qëllimi parësor i këtij parking është që të ofrojë më shumë hapësira për qarkullim dhe ta zhbllokojë qendrën e qytetit nga veturat.
“Ndërtimi i parkingut nëntokësor do ta lirojë qendrën e qytetit nga veturat, për shkak se kemi pak hapësira të parkingjeve në qytet dhe kjo do t’u ofrojë një mundësi të mirë qytetarëve që kryejnë shërbime të ndryshme në qendër të qytetit dhe nuk kanë hapësira të mjaftueshme për vendparkim. Qëllimi parësor për ndërtimin e parkingut nëntokësor është që të ofrojë më shumë hapësira për qarkullim dhe ta zhbllokojë qendrën e qytetit nga veturat”, ka thënë Zhitia.
Por, procedurat për ndërtimin e këtij parkingu kanë dështuar.
Sipas Zhitisë, nuk është vazhduar më tutje me procedurat, për shkak se ka ofertuar vetëm një kompani, e që sipas ligjit të prokurimit, minimum është që të ofertojnë dy kompani. Zhitia shprehet se këtë muaj pritet të rishpallen procedurat për herë të dytë.
Lokacioni i këtij parkingu është në qendër të qytetit, konkretisht përballë objektit të komunës së Podujevës (Sheshi “Ali Ajeti”).
Podujeva (s)ka nevojë për parking nëntoksorë
Ndërsa Nol Dedaj, ekspert i fushës së komunikacionit, thotë që nuk ka nevojë për një parking nëntokësor në Podujevë.
“Meqenëse Podujeva nuk ka transport urban, atëherë preferohet që një parking fushor të jetë afër qendrës, ndërsa parking nëntokësor nuk preferohet për shkak se nuk ka arsyeshmëri teknike dhe ekonomike”, ka thënë Dedaj.
Gjithashtu, Dedaj ka një propozim për të parin e komunës së Podujevës, Shpejtim Bulliqin.
“Së pari, kryetari i Podujevës duhet të bëjë SWOT analizën mbi arsyeshmërin e projektimit të çfarëdolloj të parkingut, pastaj të përzgjedhë se cilin lloj të parkingu mund ta ndërtojë”, është shprehur Dedaj.
Nga ana tjetër, menaxhmenti i komunës së Podujevës planifikon të ofrojë tokën për investitorin me afat 30-vjeçar, dhe të fitoj rreth 8% të qarkullimit për gjatë këtyre 30 viteve.
Sipas planifikimeve, ky projekt pritet të përfundojë në fund të vitit të ardhshëm. Shuma për këtë projekt pritet të jetë rreth 3 milionë euro dhe do të ketë kapacitet me mbi 250 vendparkingje.
