Kur e kap Djalli për veshi
Të Parin, atë nga të Tretë -
I thotë dhe përpiqet ta bindë
Se s’është Njeri -
Po, Mesia - vetë!
Pokështu edhe të Dytin e të Tretin -
Vartës e Rivalë, njëherësh, - të Tij
I kapin fët e fët dy Djaj të tjerë -
Që shtiren paksa me axhami!
- Mbas nesh!, - urdhërojnē dhe i çojnë diku -
Aty, ku, siç thuhet, Ata “bëjnë ve”
U thonë se gjithë ç’i rrethon është e Tyre -
- Këtë - thonë, - e keni ‘Merituar!
Dhe … mbrapa na keni Ne!
Ara, Fabrika, TV
Gazeta e Kullosa,
Gjykata e Shkolla,
Bjeshkë, Banka, Burgje,
Lumenj e Miniera,
Shtalla e Sipitale
Aeroporte e Ngrohtore
Teatër e Bastore
Gurëthyes e Deponi
Autostrada e Pallate
Stadiume e Kombinate
Hotele e Motele
Pompa Benzine e Varreza -
Madje dhe Kolektorë Ujërash të Zeza
- Janë Tuajat, i shikoni?
Kapni dhe mos i Lëshoni!
Djajtë u thonë se pushteti i Tyre
Për sakrificat - me meritë shtrihet
Mbi çdo gjë që preket e shihet!
Dhe se në ‘Rrupuplikën’e Tyre -
Gjithçka mund të shitet e blihet!
Se, Ata të Tre, bashkë me të tjerë
Pronto - Pronto, ‘Trima me fletë’
Kanë dhënë gjithçka për kët’ Dhé -
Që e kanë si Fé e si Atdhe -
Ndaj, hallall e paçin - përjetë!
*
Netve, mbas seancash të “zjarrta”
Kur i zë dalldia n’darka n’Zanzibar -
Aty janë dhe Qoftlargët kujdestarë -
I kapin ngadalë për veshësh - bashkë
E i nxjerrin, hopa-hopa - jashtë!
Pastaj i çojnē në Përru t’Deviqit -
I bindin se janë - stër...
... stërnipa të Milesh Kopilit -
Shqyptarit prej Kopiliqit -
Që e ka pas’ vra Sulltan Muratin
Pse i kish pas’ ngreh’ çadrat
N’prona të Familjes së Mileshit -
N’Miniera t’sotme t’Thëngjillit -
N'Mazgit e Shipitullë -
E gjithandej - Goleshit!
Pastaj i kthen bashkë n’Gërmi
I çon n’Vetërnik e Hajvali -
Bogë e Bërnicë
I çon në Prevallë
E i mburr për nj’ato vila t’bukura
E i kthen prapë n’Brezovicë ...
E u thotë Atyre: O, Bo-bo!
Dhe, Ata -
Herë bashkë, herë veç e veç
I thonë Djallit: Jo, mor, jo!
E ai u thotë: Po, mor, po!
Dhe Qoftëlargu i lavdëron:
Për Demarkacion -
E për Koalicion!
Ai, pastaj, ua kujton një për një -
Zonat Operative!
- Si, si? - pyesin njëzërit Ata
Dhe i ngatërrojnë ato -
me Toka Kooperative!
- Jo, jo, s’ka Kooperativa më!
S’besoni? Ju çoj n’Kadastër!
Aty i shihni vetë Tapitë e Vjetra -
Secila, me e ruajtur se tjetra!
N’Lëkurë Thiu, me myhyrë dylli!
Qartë, qartë - si n’dritë Dielli -
‘Origjinale’, - kthyer nga Beligradi
N’Agjenci t’Privatizimit -
Me ndërmjetësim të Mrs. Mogherinit!
*
Kryedjalli, pastaj atë të Parin -
E kap n’gjumë t’thellë:
- E duam ‘Gjithëpërfshirësen’!
Se Grupi Negociator është pajtu’ -
Ende pa u konstituu!
Dhe Atij i bëjnë veshët:
- VV - vu - vu - vu!
Dhe i kujtohet ajo loja e bukur:
“Fluturon-fluturon”!
Drejt e n’Miktofon!
Ve t’paziera, klluçe - n’tym gazi:
Mono a dioksid karbon -
Që s’të mbytë, po ... politikisht -
O te shpëton, o t’sakaton!
*
Djajtë e tjerë i çojnë Dy të Tjerët
E i bëjnë bashkë tèt-à-tèt!
Njësoj si parvjet -
Diku, ku s’dinin n’ç’vend ishin as vetë!
- A e dini ku jeni, - u thonë, -
- A e dini?
S’jeni, n’Çakorr as n’Prevllakë!
N’Ujman, jo-jo, nuk jeni!
Aty është Veç i Pari -
N’barkë me motor - te Liqeni!
N’romanin ‘Lugjet e Verdha’ është Ai -
Ku Bardheci ia pat çu’ Ujkut
‘Djalin e hasretit’ - pa çare!
Për t’mos shkelë atë që s’shkilet -
“Fjalën e Dhânē Shqyptare”!
- Nesër Ju dua bashkë -
N’Çubrel - te Përroni i Keq!
Për t’mos u ra kush mësysh -
u thotë më i madhi Dreq!
Dy të Tjerët, s’dijnë ku janë -
Po t’Parit Përroni i bēhet ’Hotel -
Mu n’zemër t’BE - së n’Bruksel!
Pastaj Qoftlargu t’Parin e çon
N’Klan t’Batos - për Opinion!
Ku Ai, si i Pavarur që është
Pyetje të pavarura i shtron!
Dhe i Pari burrnisht, si n’Oda, shpjegon:
Ç’do të thotë korrigjim kufiri -
E ç’është Demarkacion!
Dhe, në fund, i thotë miletit
Se, për të siguruar Njohjen!
(dhe Karrikën)
S’i jep Asgjë Serbisë!
Dhe, për atë që s’e jep
Do ta fitojë, - kjo merret vesh:
Një Shllungë të Madhe -
Lesh!
*
Në mbrëmje -
Mbas TV- Kaçapordhicave
I Pari Ynë, që na e ruajtë Zoti!
Le Kryekasabanë dhe shkon
Aty ku shpirti i pushon -
Mysafir n’Vendin e Meseleve
E t’bukurave Anekdota -
Për pak relaks - në Obri!
I dërmuar, jo aq nga Djajtë -
Sa nga Dy të Tjerët e Tij!
Se tash sa vjet, i lodhur shumë!
Del Ponte e Baronesha Ashton
I këndojnë alternativisht ninulla
- Flej, flej! - i thonë, -
Ec e flej - kur t’ikë i lumi gjumë!
Dhe, në Ag, fillikat vetëm
Majë mali - n’Qyqavicë -
I kap me dorë një nga një retë!
Atij s’i shkon mbrapa Historia -
Se Historia është Ai - vetë!
PS.
Djalli këtu s’është ‘I huaji’ - siç mund të (keq)kuptohet. Është Alter-egoja e liderëve tanë që përplaset me vetën e tyre, si një patogjen.
