Drejtoria rajonale e Trashëgimisë Kulturore Gjirokastër njoftoi se u realizua zbatimi i projektit “Adrion” për energjinë në Parkun Arkeologjik Antigone.
Ky projekt parashikon funksionimin e 8 paneleve diellore, të cilat kanë për qëllim masën e sigurisë së monumenteve, florës dhe faunës.
Në këtë ceremoni morën pjesë prefekti i qarkut Gjirokastër, Odise Kote, kryetari i Bashkisë Gjirokastër, Flamur Golemi, drejtori i Institutit Italian të Kulturës, Alessandro Rogero, përfaqësues i Universitetit të Maceratës, Roberto Perna, përfaqesues i ASA, Melsi Labi, etj.
Panelet diellore u dorëzuan në prezencën e DRTK Gjirokastër dhe përfaqësuesve të Parkut Arkeologjik Antigone.
Parku arkeologjik Antigone, Andrianopol, është një ndër pikat më të vizituara nga turistët gjatë udhëtimeve të tyre në luginën e Drinos.
Antigonea është një nga qytetet antike më të mëdha të territorit të Shqipërisë dhe vendbanimi më i rëndësishëm antik i Luginës së Drinosit. Brenda mureve fortifikuese të shek. III, vendbanimi ka një sipërfaqe prej 45 ha, ndërsa territori i parkut arkeologjik është mbi 90 ha.
Emrin qyteti e ka marrë nga Antigona, gruaja e parë e mbretit Piro.
