Drejtori i Zyrës për Kosovë, Petar Petkoviç, ka mbajtur pasditen e sotme një konferencë të jashtëzakonshme për mediat lidhur me rrëmbimin e tre efektivëve të policës kosovare.
Gjatë fjalës së tij ai hodhi poshtë pretendimet e palës kosovare, se efektivët ishin rrëmbyer, teksa shtoi se Beogradi është i gatshëm t’i vërë në dispozicion të gjitha provat faktorit ndërkombëtarë.
Sipas tij policia e Kurtit ishte e armatosur deri në dhëmbë dhe është arrestuar në territorin serb pranë fshatit Gnjilicë të Komunës së Rashkës. Petkoviç shtoi gjithashtu se gjithçka do të përcaktohet nga hetimi i autoriteteve serbe.
“Njësiti antiterror i Xhandarmërisë sot ka arrestuar tre pjesëtarë të njësive speciale të Kurtit të cilët ishin të armatosur deri në dhëmbë me iniciale RZBS dhe M.Š. Ata janë arrestuar në ora 12:38 thellë në territorin e Serbisë, në fshatin Gnjilicë të Komunës së Rashkës. Pjesëtarët e policisë sonë nuk kanë shkelur në territorin e Kosovës dhe Metohisë dhe nuk kanë shkelur asnjë marrëveshje ndërkombëtare, sepse nuk kanë kaluar vijën administrative, ata që e kanë shkelur janë bërë nga pjesëtarë të Policisë së Kosovës. Ne jemi të gatshëm të ofrojmë të gjitha provat dhe të hapet prapavija ndërkombëtare për këtë, që britanikët dhe amerikanët të tregojnë imazhet e tyre satelitore për të treguar se ne nuk kemi hyrë as një milimetër atje dhe të gjitha për të vërtetuar se Sveçlja gënjen kur ai thotë se janë rrëmbyer. Më shpjegoni se çfarë kërkojnë me tyta të gjata, me automatikë, me harta, me një pajisje GPS, në territorin e Serbisë qendrore, në pyll. Këtë do ta konstatojë hetimi”, tha Petkoviç.
Ndër të tjera pretendimet e palës kosovare ai i quajti propagandë, teksa shtoi se të rrëmbyer janë serbët në veri të Kosovës të cilët sipas tij arrestohen pa asnjë arsye, duke ju referuar rastit të Milenkoviç e disa të tjerëve. Sipas tij serbët e arrestuar në veri kapen e më pas rrihen e keqtrajtohen nga forcat e Albin Kurtit
"Ndryshe nga propaganda shqiptare sipas së cilës këta terroristë konsiderohen të rrëmbyer, jo, ata janë arrestuar sepse kanë kaluar vijën administrative me mjete të plota ushtarake, dhe ata që janë rrëmbyer në të vërtetë janë serbë duarzbathur të cilët janë rrëmbyer nga të ashtuquajturit. të Policisë së Kosovës si Lune Milenkoviq, Radosh Petroviç dhe Dushan Obrenoviç. Organet tona shtetërore veprojnë sipas rregullores që këta terroristë të mos torturohen dhe rrahen, ndryshe nga Obrenoviq; Petroviq dhe Milenkoviq. Dushani, sidomos, sepse e kishin rrahur aq shumë sa i ishte deformuar fytyra, kurse Lunetin e kishin mbuluar me leckë që të mos shihej se sa keq e kishin rrahur. E shihni që Kurti bën çdo gjë dita-ditës për të krijuar kaos dhe konflikte, shkakton kriza të reja. Ideja e politikës së tij është Kosova e pastër etnikisht dhe dëbimi i serbëve”, përfundoi ai.
