Anëtari i Komitetit Ekzekutiv të VMRO-DPMNE-së dhe deputet në Kuvendin e Maqedonisë Vllatko Gjorçev, sot në konferencë për shtyp tha se me rritjen e re të çmimit të derivateve të naftës, është prekur ekonomia, kompanitë, qytetarët dhe buxheti familjar.
Gjorçevi tha se prej kur LSDM ka ardhur në pushtet çmimi i dizelit është rritur për 40 përqind.
“Nëse këtij çmimi ia shtojmë edhe 3.5 denarë të akcizës që e vendosën Zoran Zaevi dhe Dragan Tevdovski, vijmë në përfundim se si janë prekur gjithë qytetarët e Maqedonisë. Për këtë arsye kërkojmë sa më parë, që qeveria dhe shumica parlamentare e Zoran Zaevit të shfuqizojë akcizën e dizelit prej 3.5 denarëve”, tha mes tjerash Gjorçev.
Ai njoftoi se grupi parlamentar i VMRO-DPMNE-së pas përfundimit të zgjedhjeve presidenciale, do të dorëzojë propozim për shfuqizimin e akcizës së dizelit.
Ndryshe, me vendim të Komisionit Rregullator për Energjetikë çmimet e derivateve të naftës janë shtrenjtuar sërish.
