Kryetari i partisë së të Gjelbërve Evropianë, Reinhard Butikofer, beson se vendimi për datë për negociata me Maqedoninë e Veriut nuk duhet të pengohet duke pasur parasysh përparimin e madh të bërë nga vendi, informon korrespondentja e AIM-së nga Brukseli.
Ky është qëndrimi i grupit të të Gjelbërve Evropianë në Parlamentin Evropian, kryetari i të cilëve Butikofer, u takua dje me Ministrin e Punëve të Jashtme të Maqedonisë së Veriut, Bujar Osmani.
Ai për AIM tha se të Gjelbrit kanë një qëndrim “shumë të qartë” mbi fillimin e bisedimeve të anëtarësimit në BE me Maqedoninë e Veriut, si dhe mbi përmbajtjen e Bullgarisë për shkak të mosmarrëveshjeve dypalëshe.
“Ne duam që korniza negociuese me Maqedoninë e Veriut të harmonizohet sa më shpejt që të jetë e mundur. Njerëzit e Maqedonisë së Veriut kanë pritur me durim për një kohë të gjatë, ata mbështetën hapa të rëndësishëm dhe të guximshëm, hapa në një kuptim të paparë, për të ndihmuar hapjen e derës për përfshirjen zyrtare të Maqedonisë së Veriut në familjen e kombeve evropiane”, tha Butikofer.
Lidhur me memorandumin bullgar dërguar vendeve anëtare që kërkojnë të zgjidhin disa mosmarrëveshje dypalëshe përpara se të miratohej korniza e negociatave, shefi i të Gjelbërve tha se “nuk është i dobishëm”.
