Talat Xhaferi, në kundërshtim me Rregulloren e Kuvendit, ka shtyrë për votim pikën për nevojën e hapjes së Kushtetutës. Sipas Rregullores votimi është dashur të bëhet ditën e premte kur ka përfunduar kërkimi dhe është siguruar kuorumi për votim, tha në konferencën e sotme për media Mile Lefkov, deputet nga OBRM-PDUKM.
“Xhaferi ka zbatuar nenin 165 paragrafin 1 të Rregullores së Punës, ndonëse rregullon një procedurë për ndryshimin e ligjit, jo për ndryshimin e Kushtetutës, për të cilën ka një kapitull të veçantë në Rregulloren e punës. Në vend të kësaj, Xhaferi është dashur të thirret në nenet 95 dhe 96 të Rregullores së Punës, sipas të cilave votimi për ndryshimin e Kushtetutës nuk mund të shtyhet. Talat Xhaferi me vetëdije e ka shkelur Rregulloren e Kuvendit për t’i lejuar BDI-së dhe LSDM-së të qëndrojnë edhe një ditë në pushtet”, thotë Lefkov.
Xhaferi, është vënë në rolin e shpëtimtarit të ulëseve qeveritare duke shkelur aktet dhe procedurat ligjore,shton deputeti i OBRM-PDUKM-së.
Sipas tij, Xhaferi është i vetëdijshëm se sa herë që të hidhen në votim amendamentet kushtetuese, ato do të dështojnë, por edhe se pas kësaj nuk ka mbetur asgjë, përveç daljes në zgjedhje, prandaj Xhaferi po vonon.
“I bëjmë thirrje Talat Xhaferit që të vijë në vete dhe të vërë në votim ndryshimet kushtetuese. Sa më gjatë të mbahet pushteti artificialisht, aq më keq do të jetë për Maqedoninë, por edhe më e vështirë do të jetë humbja e tyre”, shton Lefkov.
