Emërimi i paligjshëm i drejtorëve në disa shkolla fillore në Strugë dhe rrethinë do të presë shqyrtimin nga Ministria e Arsimit. Raportet e Prokurorisë dhe Komisionit Kundër Korrupsionit duket se janë arsye të pamjaftueshme që ministri i Arsimit, Jeton Shaqiri, t’i heq kompetencat kryetarit të Komunës së Strugës, Ramiz Merko, në fushën e arsimit. Këtë e kërkuan edhe nga Aleanca për Shqiptarët.
“Ministria e Arsimit dhe Shkencës me shkresë i është drejtuar komunës së Strugës me qëllim të informimit për të gjitha temat që janë aktuale në opinion dhe në bazë të përgjigjes do të marrim vendimet përkatëse për të cilat do të dalim me informata shtesë”, Ministria e Arsimit.
Prokuroria Publike dhe Komisioni Shtetëror për Parandalimin e Korrupsionit kanë konfirmuar se emërimi i paligjshëm i drejtorit në shkollën e fshatit Veleshtë nuk është rast i vetëm. Ata kanë dorëzuar edhe iniciativë për ndjekje penale të Merkos për keqpërdorim të pozitës dhe autorizimit zyrtar, thuhet nga Ministria e Arsimit.
“Pas kontrolleve shtesë nga evidencat e KSHPK-së për denoncime nga fusha e arsimit, të cilat i referohen territorit të komunës së Strugës, është konstatuar se nga viti 2019 deri në përditësimin e fundit të sotëm, ka pasur gjithsej 3 denoncime që kanë të bëjnë me 5 persona (gjithsej 6 persona, por një person me të njëjtin emër dhe mbiemër është përfshirë në dy raporte), – KPSHK.
Ish-inspektori i arsimit, Gjorgi Ilievski, së fundi ka treguar për Alsat se rasti i Veleshtës nuk është i vetmi në Strugë dhe se ka shembuj të emërimeve të paligjshme të drejtorëve në shkollat fillore edhe në fshatrat Podgorc dhe Llabunishtë, si dhe në shkolla fillore Vëllezërit Milladinov në Strugë.
