Nga dita e sotme do të hyjnë në fuqi, gjegjësisht do të fillojnë të zbatohen ndryshimet në Kodin Penal (KP), të cilat u votuan në Kuvendin e Republikës së Maqedonisë së veriut me një procedure të shkurtuar dhe me flamur evropian, pa debat publik.
Me ndryshimet, ndër të tjera, parashihen dënime më të ulëta për veprat që kanë të bëjnë me keqpërdorimin e pozitës zyrtare, punën e pandërgjegjshme në shërbim dhe bashkimin kriminal.
Për ndryshimet në Kodin Penal dje kanë reaguar edhe nga Gjykata e Lartë e Maqedonisë të cilët theksuan se kanë marrë version jo të plotë të ndryshimeve në Kodin Penal, pa nenet kontestuese që ulin dënimet për zyrtarët.
“Gjykata e Lartë vlerëson se miratimi i ndryshimeve ligjore pa proces transparent përmes debatit publik dhe diskutimit të ekspertëve është në kundërshtim me zotimin për reformimin e legjislacionit në përputhje me standardet evropiane”, theksuan nga Gjykata e Lartë e RMV-së.
Për ndryshimet në Kodin Penal ka pasur kritika edhe nga ndërkombëtarët.
Kritika të forta erdhën nga Komisioni Evropian për përmbajtjen, por edhe mënyrën e miratimit të ndryshimeve në Kodin Penal. Sipas Komisionit, Maqedonia është e përkushtuar të promovojë sundimin e ligjit dhe të luftojë mosndëshkimin, dhe për këtë arsye, sanksionet për aktivitetet korruptive duhet të jenë efektive dhe të përshtatshme.
Nga Brukseli, siç shtohet, shprehin keqardhjen që ndryshimet më parë nuk kanë qenë objekt konsultimesh të gjera dhe është përdorur flamuri evropian.
Ndërsa ambasadorja e SHBA-ve në RMV, Angela Aggeler tha se një ekip i juristëve të Ambasadës amerikane po i shqyrton ndryshimet në Kodin Penal.
