Në kuadër të vizitës së saj në SHBA dhe në prag të mëngjesit tradicional të lutjes së nesërme në Uashington, zv. kryeministrja përgjegjëse për politikat e qeverisjes së mirë, Sllavica Grkovska, sot mori pjesë në forumin e sigurisë me temë “Ndikimi malinj kinez dhe rus në Ballkan”.
Në prezantimin e saj, Grkovska theksoi se Maqedonia e Veriut ka qenë gjithmonë në udhëkryq të ndikimeve të ndryshme, duke përfshirë edhe ato të dëmshme që minuan çdo hap që kemi ndërmarrë si vend për t’u bërë pjesë e Aleancës dhe për të hyrë në BE.
Fatkeqësisht, siç theksoi Grkovska, këto ndikime nuk u zvogëluan me hyrjen në NATO, por u intensifikuan pasi vendi u përball me pengesa të reja për anëtarësim në Bashkimin Evropian.
Në një kontekst të tillë, narrativat e dëmshme, lajmet e rreme dhe dezinformatat përhapen gjithnjë e më thellë në shoqëri, theksoi Grkovska dhe shtoi: “E gjithë kjo është në interes të agjendave të vendeve nga të cilat Maqedonia e Veriut, historikisht, nuk ka parë asgjë të mirë. Dhe euroskepticizmi në rritje dhe ndjenjat antiperëndimore që po forcohen sistematikisht, mund të kenë pasoja të gjera në stabilitetin e shoqërisë sonë dhe të gjithë rajonit”.
Në fjalimin e saj, zëvendëskryeministrja shprehu shpresën se Shtetet e Bashkuara të Amerikës do të mbeten aleati dhe miku ynë i përkushtuar në të ardhmen, i cili në vazhdimësi i mbështet përpjekjet e Maqedonisë së Veriut për promovimin e demokracisë, sundimit të ligjit dhe ndërtimit të kapaciteteve të qëndrueshme institucionale për rritjes dhe zhvillimit.
