Pak ditë më parë Victoria Beckham ka postuar disa foto të një prej modeleve të saj duke reklamuar fustanin e famshëm me print zinxhirësh të stiluar nga ajo, që ia kemi parë fillimisht Meghan Markle dhe më pas vetë stilistes. Por kësaj radhe nuk ishte fustani ai që u komentua, por modelja të cilën Victoria kishte zgjedhur. Ajo ishte shumë e dobët, aq sa shumë prej ndjekësve u dukej e sëmurë.
Kjo nuk është hera e parë që Victoria kritikohet për preferencat që ka ndaj modeleve shumë të dobëta. Kjo gjë ka bërë që njerëzit të shprehen se kështu stilistja i nxit vajzat të dobësohen gjithnjë e më shumë duke dëmtuar shëndetin e tyre. Njerëzit i janë sulur Victoria-s në komente duke e kritikuar ashpër këtë zgjedhje nga ana e saj. Disa prej komenteve më të shpeshta në këto foto janë:
“Të lutem, ushqeji modelet e tua! Ajo duket e sëmurë.”
“I adhuroj stilimet e tua, por është e trishtueshme që promovon këtë imazh trupi.”
“Nuk mund të fokusohem fare te veshja. Vetëm mendoj se çfarë po kalon ajo vajzë për t’u dukur ashtu.”
“Modelet e tua po duken gjithnjë e më të dobëta. Çfarë po i mëson vajzës tënde dhe vajzave të tjera. Kjo është e gabuar Victoria.”
“Mendimi i parë kur e pashë ishte se ajo është e sëmurë. Sa keq që njerëz që duken kështu po përdoren si modele.”
Në vitin 2016 Victoria u sulmua online pasi postoi foton e një modeleje që dukej shumë e dobët. Po ashtu në 2015-ën, stilistja u akuzua se kishte organizuar “një sfilatë skeletesh”, kur prezantoi koleksionin e saj pranverë-verë 2016, në New York.